Trajneri i Egjiptit zbulon të vërtetën pas gjestit “X” ndaj Argjentinës dhe rrëfen bisedën me Messin

Përzgjedhësi i Egjiptit, Hossam Hassan, ka sqaruar arsyen e gjestit kontrovers me duar në formën e shkronjës “X” gjatë humbjes dramatike 3-2 ndaj Argjentinës në fazën e 1/8 së finales së Kupës së Botës.

Hassan shkaktoi reagime të shumta kur bëri këtë gjest në drejtim të arbitrit Francois Letexier në minutat shtesë të ndeshjes, duke ngritur dyshime për kuptimin e tij.

Egjipti kishte qenë në avantazh 2-0 ndaj kampionëve në fuqi të botës, por Argjentina realizoi një rikthim të jashtëzakonshëm me golat e Cristian Romero, Lionel Messit dhe Enzo Fernandezit brenda vetëm 13 minutash.

Trajneri egjiptian ka bërë të ditur se gjesti nuk kishte lidhje me racizmin, por ishte një mesazh ndaj gjyqtarit për vendimet e tij gjatë takimit.

“Ai gjest nuk kishte të bënte me racizmin. Po i thosha gjyqtarit: ‘Nuk po tregon drejtësi’”, ka deklaruar Hassan për “The Sun”.

Ai ka zbuluar gjithashtu një moment të veçantë me Lionel Messin pas incidentit, duke treguar se ylli argjentinas iu afrua për ta pyetur për veprimin e tij.

“Messi erdhi tek unë dhe më tha: ‘Pse? Pse?’ Nuk e di çfarë tjetër tha. Ishte një nga rastet e rralla kur Messi u përfshi në debate gjatë një ndeshjeje”, ka rrëfyer Hassan.

Sipas tij, Messi e përjetoi emocionalisht sfidën, ndërsa Egjipti tregoi se mund t’i krijojë probleme edhe një skuadre si Argjentina.

“Në fund ai përfundoi duke qarë, sepse po e përjetonte emocionalisht atë që po ndodhte. Ne ishim një ekip shumë i fortë dhe i vumë në vështirësi”, ka shtuar trajneri egjiptian.