Përshkallëzohet konflikti SHBA–Iran/ S*lmohet tankeri në Hormuz ndërsa vijojnë bom*ardimet

Tensionet mes Shteteve të Bashkuara dhe Iranit kanë arritur një tjetër pikë të lartë, pasi një tanker nafte u godit në Ngushticën e Hormuzit, ndërsa ushtria amerikane ka kryer sulme ndaj objektivave iraniane për natën e dhjetë radhazi.

Garda Revolucionare Islamike e Iranit (IRGC) pretendoi se ka goditur disa objekte ushtarake amerikane në Bahrein dhe Kuvajt, përfshirë sisteme të mbrojtjes ajrore, radarë dhe pajisje satelitore.

Në një deklaratë, Garda paralajmëroi se sulmet do të vijojnë me intensitet më të madh, duke kërcënuar me valë të reja sulmesh me dronë dhe raketa.

Ndërkohë, Agjencia e Operacioneve Tregtare Detare të Mbretërisë së Bashkuar (UKMTO) njoftoi se një tanker në ujërat pranë Omanit u godit nga një predhë e paidentifikuar, duke detyruar ekuipazhin të braktiste anijen dhe të kalonte në një varkë shpëtimi.

Sulmi ndaj anijes erdhi menjëherë pasi ushtria amerikane njoftoi përfundimin e një tjetër nate sulmesh kundër Iranit. Sipas Komandës Qendrore Amerikane (CENTCOM), objektivat përfshinin qendra komanduese ushtarake, kapacitete detare, baza raketore, dronë dhe sisteme të mbrojtjes ajrore.

SHBA-ja deklaroi se operacionet synojnë të kufizojnë aftësinë e Iranit për të sulmuar anijet tregtare që kalojnë përmes Ngushticës së Hormuzit, një nga korridoret më të rëndësishme të transportit të naftës dhe gazit në botë.

Përplasjet e fundit kanë shkaktuar ndërprerje të trafikut detar në këtë zonë dhe kanë ndikuar në tregjet energjetike. Çmimi i naftës Brent është rritur mbi 90 dollarë për fuçi, ndërsa nafta amerikane ka shënuar gjithashtu rritje.

Ndërkohë, përpjekjet diplomatike vazhdojnë. Pakistani ka marrë një rol ndërmjetësues mes palëve, ndërsa sekretari amerikan i Shtetit, Marco Rubio, ka deklaruar se Uashingtoni është i gatshëm për negociata me Teheranin, por vetëm për një marrëveshje që sipas tij të jetë e zbatueshme dhe reale.