Gjermani/ Mijëra punonjës të shitjes me pakicë në grevë për paga, paralizohen qendrat tregtare në disa qytete

Mijëra punonjës të sektorit të shitjes me pakicë dhe tregtisë në Gjermani kanë nisur një valë grevash pas dështimit të negociatave për rritjen e pagave me punëdhënësit.

Sindikata ka bërë thirrje për protesta të reja në mbarë vendin, duke kërkuar presion më të madh në tryezën e bisedimeve kolektive, pasi palët nuk kanë arritur ende një marrëveshje.

Sipas sindikatës, tubime dhe greva janë planifikuar në disa qytete të mëdha gjermane, përfshirë Berlinin, Hamburgun, Hanoverin, Dortmundin dhe Wiesbadenin.Përfaqësuesja e Ver.di për sektorin e tregtisë, Silke Zimmer, tha se punëdhënësit po vonojnë qëllimisht procesin e negociatave.

Ajo deklaroi se pas më shumë se 25 raundesh bisedimesh në nivel rajonal, oferta e fundit e punëdhënësve mbetet minimale dhe nuk garanton rritje reale të pagave.

Punëdhënësit kanë propozuar një rritje prej 2.4% duke nisur nga nëntori 2026 dhe një tjetër rritje prej 2% në gusht 2027, në kuadër të një marrëveshjeje dyvjeçare, por kjo është refuzuar nga sindikata.Ver.di kërkon një rritje prej 7% të pagave, me të paktën 225 euro më shumë në muaj për punëtorët, në një marrëveshje njëvjeçare.

Sipas sindikatës, sektori i shitjes me pakicë dhe tregtisë punëson mbi 5.2 milionë njerëz në Gjermani, duke e bërë atë një nga sektorët më të mëdhenj të ekonomisë private në vend.

Negociatat e radhës pritet të vazhdojnë javën e ardhshme në disa rajone gjermane, ndërsa grevat paralajmëruese mund të thellohen nëse nuk arrihet kompromis.