New Yorku vendos kufizime të reja/ Syzet inteligjente ndalohen në të gjitha gjykatat

New Yorku do të bëhet shteti i parë amerikan që ndalon përdorimin e syzeve inteligjente në të gjitha objektet gjyqësore, për shkak të shqetësimeve për regjistrime të paautorizuara.

Masa do të hyjë në fuqi më 20 korrik dhe do të zbatohet në më shumë se 1200 gjykata në të gjithë shtetin. Ndalimi përfshin të gjitha syzet me kamera ose mikrofon, përfshirë edhe modelet me lente optike.

Vizitorët që do të kenë me vete këto pajisje do të duhet t’i dorëzojnë pranë shërbimeve të sigurisë përpara hyrjes në ambientet gjyqësore.

Autoritetet e New Yorkut kanë deklaruar se vendimi synon të mbrojë privatësinë e dëshmitarëve, anëtarëve të jurisë dhe integritetin e proceseve gjyqësore, pasi teknologjia e re e bën më të vështirë identifikimin e regjistrimeve të fshehta.

Me këtë vendim, New Yorku bëhet juridiksioni i parë në Shtetet e Bashkuara që vendos një ndalim të tillë në të gjithë sistemin e gjykatave.