Kujdes shoferë! Ky buton i klimës mund të rrezikojë përqendrimin nëse përdoret gjatë

Gjatë ditëve me temperatura të larta, klima e makinës është një nga funksionet më të përdorura nga shoferët për të siguruar një udhëtim më të rehatshëm. Por një nga butonat e saj mund të sjellë probleme nëse lihet i aktivizuar për një kohë të gjatë.

Bëhet fjalë për funksionin e qarkullimit të brendshëm të ajrit, i njohur si recirkulimi, i cili bën që sistemi i klimës të përdorë të njëjtin ajër brenda kabinës, duke mos marrë ajër të ri nga jashtë.

Ky funksion është i dobishëm sidomos në fillim të udhëtimit, pasi ndihmon makinën të ftohet më shpejt dhe pengon hyrjen e aromave të pakëndshme apo gazrave nga ambienti i jashtëm.

Megjithatë, përdorimi i zgjatur mund të krijojë probleme. Në një kabinë të mbyllur mund të rritet niveli i dioksidit të karbonit (CO₂) dhe të ulet sasia e ajrit të freskët, gjë që mund të shkaktojë lodhje, përgjumje, ulje të përqendrimit dhe reagime më të ngadalta gjatë drejtimit.

Ekspertët këshillojnë që recirkulimi të përdoret vetëm për periudha të shkurtra, për shembull për të ulur shpejt temperaturën brenda makinës, dhe më pas të rikthehet marrja e ajrit nga jashtë.

Shoferët duhet të tregohen të kujdesshëm veçanërisht gjatë udhëtimeve të gjata. Nëse ndjejnë lodhje të papritur ose përgjumje, një nga gjërat që duhet të kontrollojnë është nëse ky funksion ka mbetur i ndezur për një kohë të gjatë.