Gazeta italiane: Katoliku Ronaldo gjuan penalltinë me “Bismallah”, reagimi për zëvendësimin dhe dedikimi emocionues

Portugalia ka festuar gjerësisht Cristiano Ronaldon pas kualifikimit të kombëtares së Martinez në fazën e 1/8-ve të Kupës së Botës. Gazeta “Record” e vendosi portretin e tij në faqen e parë, duke theksuar gëzimin dhe ndikimin e tij. Pas fitores, ylli portugez postoi një foto me ekipin dhe fanellën numër 21 të Diogo Jota, duke shkruar: “Fituan për veten tonë, për Diogo-n dhe për Portugalinë. Përpara!”. Edhe rrjetet sociale shpërthyen nga entuziazmi.

Ronaldo shënoi golin e tij të parë në një ndeshje me eliminim direkt në një Botëror, duke udhëhequr skuadrën me lidership dhe personalitetin e tij të zakonshëm. Të gjithë tani janë me të. Një moment i veçantë ishte penalltia në minutën e 70-të, ku Cristiano barazoi rezultatin duke mposhtur Livakovic. Por ajo që tërhoqi vëmendjen ishte çfarë ndodhi para goditjes. Një video e postuar në internet, e cila u bë virale shumë shpejt, tregon Ronaldon duke përsëritur tri herë “Bismallah”, një shprehje që do të thotë “në emër të Zotit ose Allahut”. Kjo shprehje përdoret tradicionalisht nga myslimanët para se të fillojnë çdo veprim të rëndësishëm ditor, për të thirrur bekimin hyjnor.

Një tjetër imazh i spikatur nga ndeshja e CR7 ishte momenti i fundit i tij në fushë. Kur sulmuesi pa tabelën elektronike dhe kuptoi se duhej të dilte, fytyra e tij ndryshoi, duke shfaqur një smorfie që bëri xhiron e botës.

Pas ndeshjes, Ronaldo iu përgjigj pyetjeve të gazetarëve, veçanërisht për Diogo Jota dhe Luka Modric. “Fituan për të. Ishte e pabesueshme edhe në nivel emocional,” tha ai për Jota. Ndërsa për mesfushorin e Milanit, ai shtoi: “Unë dhe Luka kemi luajtur bashkë shumë vite, ai është një legjendë e këtij sporti. U përqafuam dhe e përgëzova për atë që po bën. Ishte bukur të luaja kundër tij edhe një herë.”

Marrë nga La Gazzetta dello Sport