Sekreti për një zemër më të fortë? Ekspertët këshillojnë konsumimin e këtyre katër frutave...

Ajo që vendosni çdo ditë në pjatë mund të ndikojë drejtpërdrejt në shëndetin e zemrës. Sipas një kardiologu, konsumimi i disa frutave mund të ndihmojë në uljen e rrezikut të infarktit, goditjes në tru dhe sëmundjeve të tjera kardiovaskulare.

Sëmundjet e zemrës zhvillohen kur në muret e arterieve grumbullohen depozita yndyrore, të cilat ngushtojnë enët e gjakut dhe pengojnë furnizimin normal të zemrës me oksigjen dhe lëndë ushqyese. Edhe pse faktorë si mosha dhe trashëgimia nuk mund të ndryshohen, dieta dhe mënyra e jetesës luajnë një rol vendimtar në parandalimin e tyre.

Kardiologu David Min, MD, tha për revistën “Eating Well” se një numër i madh studimesh kanë treguar se konsumimi i rregullt i frutave lidhet me një rrezik më të ulët për infarkt në zemër, goditje në tru dhe vdekje nga sëmundjet kardiovaskulare.

Një sërë studimesh kanë treguar se konsumimi i më shumë frutave mund të ulë rrezikun e infarktit në zemër, goditjes në tru dhe vdekjes nga sëmundjet kardiovaskulare-tha ai.

Mollët

Mollët janë ndër frutat më të rekomanduara për shëndetin e zemrës falë përmbajtjes së lartë të fibrave dhe antioksidantëve.

Fibrat ndihmojnë në uljen e kolesterolit “të keq” (LDL), ndërsa antioksidantët luftojnë stresin oksidativ dhe inflamacionin, dy faktorë që lidhen me zhvillimin e sëmundjeve të zemrës. Konsumimi i rregullt i mollëve është lidhur edhe me përmirësimin e tensionit të gjakut.

Avokado
Edhe pse teknikisht është frut, avokado është e pasur me yndyrna të pangopura, të cilat konsiderohen të dobishme për zemrën.

Avokado është një burim i shkëlqyer i acideve yndyrore të pangopura, të cilat janë yndyrna të shëndetshme për zemrën. Ato ulin kolesterolin e keq (LDL) dhe rrisin kolesterolin e mirë (HDL)- shpjegoi Dr. Min.

Përveç kësaj, avokado përmban kalium, një mineral që ndihmon në mbajtjen nën kontroll të tensionit të gjakut.

Boronicat

Boronicat janë të pasura me fibra dhe antioksidantë, veçanërisht antocianina, përbërës që u japin ngjyrën karakteristike blu-vjollcë.

Këta antioksidantë ndihmojnë në neutralizimin e radikaleve të lira, të cilat në sasi të mëdha mund të dëmtojnë qelizat dhe enët e gjakut.

Mendoni për to si roje të enëve të gjakut: ato mund të ndihmojnë në uljen e tensionit të gjakut, përmirësimin e elasticitetit të arterieve dhe rritjen e kolesterolit të mirë (HDL), i cili ndihmon në mbrojtjen e arterieve-tha Dr. Min.

Portokallët
Portokallët njihen për përmbajtjen e lartë të vitaminës C, por ekspertët theksojnë se përfitimet e tyre shkojnë përtej këtij vitamini.

Kardiologia Audrey T. Damren shpjegoi se ato përmbajnë flavanone, substanca bimore që ndikojnë pozitivisht në shëndetin kardiovaskular.

Është vërtetuar se flavanonet ndihmojnë në uljen e tensionit të gjakut, përmirësimin e niveleve të kolesterolit, reduktimin e inflamacionit dhe mbështetjen e rregullimit të shëndetshëm të sheqerit në gjak, të gjithë faktorë të rëndësishëm për uljen e rrezikut të sëmundjeve kardiovaskulare-tha ajo.

Çfarë i shkakton sëmundjet e zemrës?

Sëmundjet e zemrës zakonisht shkaktohen nga grumbullimi i pllakave yndyrore në arteriet që furnizojnë zemrën me gjak. Me kalimin e kohës, këto depozita ngushtojnë enët e gjakut dhe rrisin rrezikun për infarkt ose goditje në tru.

Sipas Shërbimit Kombëtar Shëndetësor britanik (NHS), faktorët kryesorë të rrezikut janë:

-pirja e duhanit;

-tensioni i lartë i gjakut;

-kolesteroli i lartë;

-mungesa e aktivitetit fizik;

-diabeti;

-mbipesha ose obeziteti;

-historia familjare e sëmundjeve të zemrës.

Si mund të mbrohet zemra?

Ekspertët rekomandojnë një kombinim të zakoneve të shëndetshme, ku përfshihen:

-aktiviteti fizik i rregullt;

-mbajtja e një peshe të shëndetshme;

-ndalimi i duhanit;

-kufizimi i konsumit të alkoolit;

-kontrolli i tensionit të gjakut dhe diabetit;

-një regjim ushqimor i pasur me fruta, perime, drithëra integrale dhe fibra, si dhe me pak yndyrna të ngopura.

Edhe pse asnjë ushqim nuk mund të garantojë mbrojtje të plotë nga sëmundjet e zemrës, ekspertët theksojnë se konsumimi i rregullt i frutave si mollët, avokadot, boronicat dhe portokallët mund të jetë një hap i rëndësishëm drejt një zemre më të shëndetshme.