Siria hap derën e një marrëveshjeje me Izraelin/ Ahmed al-Sharaa: Po punojmë për një pakt sigurie që mund të çojë drejt paqes

Presidenti i Sirisë, Ahmed al-Sharaa, ka bërë të ditur se Damasku po punon aktivisht për arritjen e një marrëveshjeje sigurie me Izraelin, me ndërmjetësimin dhe pjesëmarrjen e disa vendeve.

Në një intervistë ekskluzive për programin “Al Muqabala” të Al Jazeera Media Network, al-Sharaa deklaroi se shpreson që një marrëveshje e tillë të shërbejë si një hap i parë drejt një procesi më të gjerë paqeje në rajon.

Sipas tij, një marrëveshje sigurie nuk do të nënkuptonte heqjen dorë nga pretendimet e Sirisë mbi Lartësitë e Golanit, territor i pushtuar nga Izraeli që prej vitit 1967 dhe i aneksuar më vonë nga ky i fundit, një veprim që nuk është njohur nga shumica e komunitetit ndërkombëtar.

“Ne po përpiqemi të shmangim çdo përplasje me Izraelin. Një marrëveshje sigurie mund të krijojë mundësinë për një zgjidhje më të gjerë dhe gjithëpërfshirëse të krizës”, tha al-Sharaa.
Deklaratat vijnë në një kohë tensionesh të vazhdueshme në Sirinë jugore, pas sulmeve dhe ndërhyrjeve izraelite të raportuara që nga ardhja e al-Sharaas në pushtet në dhjetor 2024, pas rënies së qeverisë së Bashar al-Assad.

Kreu sirian foli gjithashtu për marrëdhëniet me Libanin, duke mohuar se Damasku ka plane për një ndërhyrje ushtarake në vendin fqinj.

Ai tha se qeveria siriane po diskuton me autoritetet libaneze mënyrat për të ndihmuar stabilitetin dhe sigurinë e Libanit.

Situata në Libanin jugor mbetet e tensionuar pas muajsh përleshjesh mes Hezbollahut dhe forcave izraelite. Autoritetet libaneze kërkojnë rikthimin e kontrollit mbi territoret e pushtuara dhe vendosjen e monopolit shtetëror mbi armët në vend.
Al-Sharaa deklaroi gjithashtu mbështetjen e Damaskut për kufizimin e armëve dhe për faktin që vendimet për luftën dhe paqen të jenë ekskluzivisht në duart e shtetit libanez.