Putin përmend Poloninë, Hungarinë dhe Rumaninë: Ukraina do t’i humbë tokat perëndimore

Presidenti rus Vladimir Putin ka rikthyer debatin për kufijtë dhe territoret e Ukrainës, duke pretenduar se vendi do të humbasë në të ardhmen disa zona perëndimore që, sipas tij, kanë qenë historikisht pjesë e kombeve të tjera evropiane.

Gjatë një takimi me pjesëtarë të marinës ruse në kuadër të Ditës së Marinës, Putin u shpreh se ndryshimet territoriale mund të ndodhin me kalimin e kohës, duke përmendur territore që sipas tij kanë pasur lidhje historike me Poloninë, Hungarinë dhe Rumaninë.

“Jam i sigurt se herët a vonë Ukraina do t’i humbë këto toka perëndimore”, u shpreh Putin.

Sipas tij, ky proces nuk do të ndodhte domosdoshmërisht menjëherë, por sipas një perspektive afatgjatë.

“Jo nesër, ndoshta jo pasnesër, pas një viti, dy, 10 apo 15 vjetësh, por gjithçka do të vendoset në vendin e vet nga këndvështrimi historik”, tha presidenti rus.

Deklarata ka nxitur reagime dhe analiza mbi mesazhin politik të Kremlinit. Sipas disa ekspertëve të komunikimit, referimi te territoret historike mund të synojë të ndikojë te grupet nacionaliste në Poloni, Hungari dhe Rumani, duke rikthyer diskutime mbi pretendimet territoriale dhe duke rritur tensionet politike në këto vende.

Ndërkohë, në planin diplomatik, zyrtarë ukrainas dhe amerikanë kanë diskutuar një propozim për një armëpushim ajror me Rusinë.

Nga ana e tij, zëdhënësi i Kremlinit, Dmitry Peskov, e ka konsideruar të parakohshëm komentimin mbi një nismë të tillë, duke mos dhënë detaje për qëndrimin e Moskës ndaj saj.