Përfundojnë fjalimet, protestuesit nisin marshimin në rrugët e Tiranës

Pavarësisht reshjeve të shiut që kanë përfshirë kryeqytetin gjatë mbrëmjes së sotme, protestuesit nuk kanë hequr dorë nga aksioni i tyre qytetar dhe kanë vijuar marshimin në rrugët e Tiranës në kuadër të protestës së 25-të kundër qeverisë.

Të pajisur me çadra dhe mjete të tjera për t’u mbrojtur nga shiu, qytetarët kanë nisur marshimin në disa nga akset kryesore të kryeqytetit. Gjatë lëvizjes së tyre, protestuesit hodhën thirrje kundër qeverisë dhe përsëritën kërkesat që kanë artikuluar prej javësh në tubimet e zhvilluara në Tiranë.

Shiu i vazhdueshëm nuk ndikoi në pjesëmarrjen e qytetarëve, të cilët vijuan marshimin përgjatë itinerarit të përcaktuar nga organizatorët. Në disa momente, protestuesit ndaluan për të mbajtur fjalime dhe për të përcjellë mesazhet e tyre ndaj institucioneve shtetërore.

Pjesëmarrësit deklaruan se prania e tyre në protestë pavarësisht motit të keq është një tregues i vendosmërisë për të vijuar aksionin qytetar. Sipas tyre, reshjet e shiut nuk mund të zbehin pakënaqësinë e qytetarëve dhe as të pengojnë protestat që po zhvillohen prej disa javësh.