KKIE takim ndërgjegjësues për rolin e Kuvendit në negociatat me BE-në

Këshilli Kombëtar i Integrimit Europian (KKIE) organizoi një takim ndërgjegjësues mbi rolin e Kuvendit dhe të KKIE-së në procesin e negociatave me Bashkimin Europian.

Aktiviteti u zhvillua me mbështetjen e Shërbimit të Edukimit Qytetar dhe Zyra e Friedrich-Ebert-Stiftung (FES) në Shkup.

Në aktivitetin, e zhvilluar në sallën plenare të Kuvendit, morën pjesë 30 studentë të Akademisë Politike nga Maqedonia e Veriut, të cilët u njohën me funksionin e Kuvendit dhe të KKIE-së në mbikëqyrjen e procesit të negociatave, forcimin e transparencës dhe kontrollin parlamentar ndaj angazhimeve të qeverisë në procesin e integrimit europian.

Takimi u përshëndet nga Taulant Balla, bashkëkryetar i KKIE-së, i cili, pasi u uroi mirëseardhjen pjesëmarrësve, prezantoi ecurinë e deritanishme të negociatave me Bashkimin Europian, sfidat me të cilat përballet procesi, të cilin e vlerësoi jo vetëm si një negociatë politike, por si një transformim të thellë të shtetit dhe shoqërisë shqiptare.
Në fjalën e tij, Balla theksoi gjithashtu mbështetjen e lartë të qytetarëve shqiptarë për anëtarësimin në Bashkimin Europian, duke nënvizuar se orientimi europian ka qenë dhe mbetet i vetmi objektiv strategjik i Shqipërisë.

Duke u ndalur te marrëdhëniet rajonale, Balla u shpreh se autoritetet shtetërore në Maqedoninë e Veriut duhet t’i respektojnë shqiptarët si kombësi shtetformues dhe se e drejta për shkollim dhe përdorim të gjuhës shqipe kudo është detyrim dhe nuk mund të negociohet. Ai theksoi se Maqedonia e Veriut duhet të ecë përpara në rrugën e anëtarësimit në BE.

Në vijim, Elda Zenelaj, drejtore e Sekretariatit Teknik të KKIE-së, informoi të pranishmit mbi përbërjen dhe rolin e Këshillit, monitorimin e zbatimit të detyrimeve që lidhen me procesin e negociatave me BE-në, transparencën e procesit legjislativ dhe përafrimin me legjislacionin europian, si dhe nxitjen e garantimin e bashkëpunimit gjithëpërfshirës ndërmjet institucioneve, forcave politike dhe grupeve të interesit në këtë proces.

Takimi vijoi me pyetje dhe diskutime mbi sfidat e procesit të negociatave, zgjerimin e Bashkimit Europian dhe perspektivën europiane të rajonit etj.