Kek me çokollatë dhe kajsi që 'shkrihet' në gojë, receta e thjeshtë që po fiton popullaritet

Një kek i butë me çokollatë dhe kajsi po shihet si një nga ëmbëlsirat më të thjeshta dhe më të shijshme për t’u përgatitur në shtëpi. Kombinimi i çokollatës së zezë me reçelin e kajsisë i jep një shije të balancuar mes ëmbëlsisë dhe lehtësisë së frutave.

Receta përfshin vezë, sheqer, gjalpë, çokollatë të zezë, miell, kakao, pluhur për pjekje, reçel kajsie dhe ajkë të ëmbël për glazurën.

Fillimisht, gjalpi shkrihet bashkë me çokollatën dhe lihet të ftohet pak. Më pas rrihen vezët me sheqerin derisa masa të bëhet e fryrë dhe e lehtë, ku shtohet përzierja me çokollatë.

Pas kësaj shtohen përbërësit e thatë dhe masa vendoset në kallëp për pjekje në temperaturë 180 gradë për rreth 35 minuta. Pasi të ftohet, keku ndahet në dy pjesë.

Pjesa e poshtme lyhet me reçel kajsie dhe mbulohet me shtresën tjetër të kekut. Më pas përgatitet glazura me çokollatë dhe ajkë të ngrohur, e cila hidhet sipër kekut për një përfundim të lëmuar dhe me shkëlqim.

Pas ftohjes, keku pritet në copa dhe shërbehet i gatshëm për konsum.