Trump pritet të akuzojë Kinën për ndërhyrje në zgjedhjet e 2026/ CBS zbulon detaje nga fjalimi presidencial

Presidenti i Shteteve të Bashkuara, Donald Trump, pritet t’i drejtohet publikut me një fjalim televiziv në orarin kryesor, ku tema kryesore do të jenë pretendimet për ndërhyrje të Kinës në zgjedhjet amerikane të vitit 2026.

Sipas CBS News, duke cituar burime të njohura me përmbajtjen e fjalimit, Trump pritet të përqendrohet te pretendimet se Pekini ka komprometuar të dhënat e votuesve amerikanë dhe se agjencitë amerikane të inteligjencës nuk e kanë informuar për këto zhvillime gjatë mandatit të tij të parë.

Në fjalim pritet të marrin pjesë edhe drejtues të institucioneve kryesore të sigurisë amerikane, përfshirë përfaqësues nga CIA, FBI, Zyra e Drejtorit të Inteligjencës Kombëtare dhe Departamenti i Sigurisë Kombëtare.

Megjithatë, zëdhënësja e Shtëpisë së Bardhë, Karoline Leavitt, ka mohuar raportimet për përmbajtjen e fjalimit, duke thënë se pretendimet e burimeve anonime janë vetëm spekulime.

Trump e kishte paralajmëruar më herët mbajtjen e këtij fjalimi, duke bërë të ditur se do të lidhej me zgjedhjet, por pa dhënë detaje të tjera.

Raportet e mëparshme të komunitetit amerikan të inteligjencës kanë vlerësuar se Kina nuk kishte tentuar të ndikonte në rezultatin e zgjedhjeve të vitit 2020 dhe as të cenonte infrastrukturën zgjedhore. Megjithatë, disa zyrtarë të sigurisë kibernetike kanë shprehur dyshime për përpjekje të mundshme për ndikim përmes rrjeteve sociale dhe deklaratave publike.

Çështja pritet të rikthejë debatet mbi sigurinë zgjedhore, ndërhyrjet e huaja dhe përplasjet politike mes Uashingtonit dhe Pekinit.