19-vjeçari shqiptar arratiset nga qendra e dëbimit në Britani, Home Office nis kërkimet për kapjen e tij

Një shtetas shqiptar është arratisur nga një qendër paraburgimi për emigracion, ka konfirmuar Ministria e Brendshme britanike (Home Office).

Sky News mëson se 19-vjeçari u arratis më 14 korrik, gjatë një transferimi për në spital nga qendra e paraburgimit për emigrantë në Oxfordshire.

Individi nuk mendohet të përbëjë rrezik për publikun.

Në një deklaratë, një zëdhënës i Home Office tha: “Ne mund të konfirmojmë se një person i ndaluar u arratis ndërsa ishte nën shoqërim gjatë transportit nga Qendra e Paraburgimit për Emigracion në Campsfield më 14 korrik 2026.

Ne kemi masa të forta për të gjurmuar dhe ndaluar personat që arratisen. Nuk do të ishte e përshtatshme të komentojmë më tej gjatë një hetimi aktiv.”

Incidenti vjen më pak se një vit pasi Campsfield u rihap si pjesë e planeve të qeverisë për të zgjeruar kapacitetet e ndalimit të emigrantëve.

Qendra ishte mbyllur në vitin 2019 pas vitesh problemesh, përfshirë greva urie, raste të vetëlëndimit dhe vetëvrasje.

Ajo u rihap në vitin 2025 pas një rikonstruksioni të madh dhe është pjesë e planeve për zgjerimin e kapaciteteve të ndalimit, në përpjekjen e qeverisë për të rritur numrin e personave të ndaluar dhe të larguar nga Britania e Madhe, të cilët nuk kanë të drejtë ligjore për të qëndruar në vend.

Që nga ardhja në pushtet, Home Office pretendon se 70 mijë persona janë larguar nga Mbretëria e Bashkuar, ndërsa kthimet dhe dëbimet tani janë në nivelin më të lartë të gati një dekade.

Shtetasit shqiptarë kanë qenë kombësia më e zakonshme mes personave të kthyer nga Britania përmes largimeve të detyruara.

Sipas shifrave më të fundit të Home Office, ata përbënin pothuajse një të katërtën e të gjitha largimeve të detyruara, me 2,247 persona të larguar.

Rritja e numrit të kthimeve erdhi pas nënshkrimit të Komunikatës së Përbashkët Britani–Shqipëri në dhjetor 2022, pas rritjes së ndjeshme të numrit të shtetasve shqiptarë që kaluan Kanalin Anglez me varka të vogla gjatë atij viti.

Sky News mëson se ekipet e Hetimeve Kriminale dhe Financiare të Zbatimit të Emigracionit në Home Office (CFI) po udhëheqin kërkimin për të ndaluarin, me mbështetjen e njësive të inteligjencës së Home Office.