Heroi i Kepit të Gjelbër në Botëror mbetet pa kontratë, Inter Majemi kërkon portierin 40-vjeçar

Portieri i Kepit të Gjelbër, Vozinja, është kthyer në një nga surprizat më të mëdha të Botërorit 2026, pas paraqitjeve të tij të spikatura që ndihmuan skuadrën afrikane të shkonte përtej pritshmërive në turneun më të rëndësishëm të futbollit.

Në moshën 40-vjeçare, gardiani veteran dhuroi pritje vendimtare dhe u bë një nga figurat kryesore të ekipit të tij, i cili arriti të kalonte fazën e grupeve dhe ishte pranë një tjetër rezultati historik përballë Argjentinës.

Pavarësisht këtij suksesi, Vozinja aktualisht është pa klub. Kontrata e tij me Çaves në kategorinë e dytë të futbollit portugez ka përfunduar dhe portieri është në kërkim të një aventure të re.

Paraqitjet në Botëror kanë ndryshuar situatën, pasi interesimi për të është rritur ndjeshëm. Sipas mediave spanjolle, një nga klubet që po ndjek më me interes situatën e tij është Inter Majemi, skuadra ku luan Lionel Mesi.

Argjentinasi ka pasur mundësinë ta shohë nga afër nivelin e portierit gjatë përballjes në Botëror, ndërsa klubi amerikan po shqyrton mundësinë për ta afruar atë në radhët e veta.

Megjithatë, interesimi për Vozinjën nuk lidhet vetëm me aspektin sportiv. Rritja e jashtëzakonshme e popullaritetit të tij pas Botërorit ka tërhequr vëmendjen edhe për vlerën e imazhit.

Portieri ka kaluar nga rreth 50 mijë ndjekës në rrjetet sociale në mbi 20 milionë, duke u kthyer në një figurë globale. Për këtë arsye, disa klube e shohin afrimin e tij jo vetëm si një përforcim në fushë, por edhe si një mundësi të madhe marketingu.

Pas një karriere të gjatë, Vozinja tashmë ndodhet përballë një mundësie të veçantë për të mbyllur historinë e tij me një transferim të madh.