Meloni zbut tensionet me Trump: Marrëdhëniet Itali-SHBA nuk rrezikohen!

Kryeministrja italiane Giorgia Meloni ka minimizuar tensionet e fundit me presidentin amerikan Donald Trump, duke theksuar se marrëdhëniet mes Italisë dhe Shteteve të Bashkuara mbeten të forta dhe nuk rrezikohen nga polemikat e ditëve të fundit.

Duke folur në një aktivitet në Romë, Meloni deklaroi se bashkëpunimi mes dy vendeve mbështetet në një histori të gjatë dhe të konsoliduar, ndaj nuk mund të vihet në dyshim nga debatet në rrjetet sociale.

Tensionet mes dy liderëve u ndezën pas pretendimeve të Trump, i cili tha se Meloni i ishte lutur për një foto gjatë samitit të fundit të G7. Presidenti amerikan deklaroi se kishte pranuar të pozonte me kryeministren italiane sepse i kishte ardhur keq për të.

Meloni reagoi menjëherë, duke i cilësuar deklaratat e Trump si "krejtësisht të sajuara" dhe duke theksuar se as ajo dhe as Italia nuk i kishin kërkuar askujt një foto.

E pyetur për debatin, kryeministrja italiane pranoi se ishte e mërzitur nga situata, por nënvizoi se nuk synon ta përshkallëzojë më tej çështjen dhe se marrëdhëniet dypalëshe duhet të rikthehen në normalitet.

Ajo shtoi se, pavarësisht mosmarrëveshjeve të fundit, bashkëpunimi mes Romës dhe Uashingtonit ka vijuar në mënyrë konstruktive gjatë muajve të fundit.

Dy liderët kishin shfaqur më herët divergjenca edhe lidhur me konfliktin me Iranin, pasi Italia refuzoi të lejojë përdorimin e bazave të saj ushtarake nga Shtetet e Bashkuara për operacione sulmuese.