Kryeministri i Hungarisë propozon legjendën e shahut Judit Polgar për Presidente të vendit

Kryeministri i Hungarisë, Peter Magyar, ka propozuar mjeshtren e madhe të shahut, Judit Polgar, për postin e presidentes së vendit, pas largimit nga detyra të presidentit aktual si pasojë e ndryshimeve kushtetuese.

Magyar ka deklaruar se Hungaria ka nevojë për një figurë që bashkon qytetarët dhe që gëzon respekt të gjerë.

“Vendi ynë ka nevojë për unitet, paqe dhe një presidente për të cilën të gjithë hungarezët të jenë krenarë”, ka shkruar ai në një postim në Facebook, duke bërë të ditur se do të takohet me Polgar për ta pyetur nëse është e gatshme ta marrë këtë përgjegjësi.

Judit Polgar konsiderohet si lojtarja më e madhe femër e shahut në histori. Ajo ka mbajtur për 25 vite radhazi vendin e parë në renditjen botërore për femra dhe u tërhoq nga garat profesionale në vitin 2014.

Polgar fitoi famë ndërkombëtare duke konkurruar në turne kundër shahistëve meshkuj dhe duke u renditur mes lojtarëve më të mirë të botës në një sport tradicionalisht të dominuar nga burrat. Ajo është e vetmja grua që ka kaluar pragun e 2700 pikëve në renditjen Elo, nivel i konsideruar si ai i “Super Grandmasterëve”.

Propozimi i saj vjen pas miratimit nga parlamenti hungarez të një ndryshimi kushtetues që çoi në largimin nga detyra të presidentit Tamas Sulyok, i cili konsiderohej aleat i ish-kryeministrit Viktor Orban.

Peter Magyar, i cili fitoi zgjedhjet e prillit me premtimin për një “ndryshim regjimi” pas 16 vitesh qeverisje të Orbanit, ka kritikuar ish-presidentin dhe zyrtarë të tjerë të lartë për afërsinë e tyre me qeverinë e mëparshme.

Aktualisht, detyrën e presidentes së përkohshme e mban kryetarja e parlamentit, Agnes Forsthoffer, e cila do të qëndrojë në këtë post deri në zgjedhjen e presidentit të ri brenda 30 ditësh.

Ndryshimet kushtetuese kanë shkaktuar reagime nga disa organizata për të drejtat e njeriut, të cilat kanë shprehur shqetësime për ndikimin e tyre mbi pavarësinë e institucioneve shtetërore.