Botërori 2026, turneu i përmbysjeve spektakolare/ Vendoset një rekord historik pas minutës së 90-të

Kupa e Botës 2026 po dhuron emocione të jashtëzakonshme dhe përmbysje spektakolare, ndërsa është vendosur tashmë një rekord i ri. Deri në këtë fazë të turneut, plot 10 ndeshje janë fituar falë golave të shënuar pas minutës së 90-të, më shumë se në çdo edicion tjetër të historisë së Botërorit.

Rekordi i fundit u vendos nga Enzo Fernandez, i cili u bë heroi i Argjentinës në përballjen dramatike ndaj Egjiptit në raundin e 1/8-ave. Mesfushori realizoi me kokë në minutën 90+2, duke vulosur fitoren 3-2 dhe një nga përmbysjet më spektakolare të turneut.

Argjentina ishte në disavantazh 2-0, por reagoi në mënyrë të jashtëzakonshme duke shënuar tre gola brenda pak më shumë se dhjetë minutash. Fillimisht rrjetën e tundën në minutën e 79-të dhe të 83-të, ndërsa goli vendimtar i Fernandez në kohën shtesë çoi në festë kampionët e botës.

Sipas statistikave të Opta, ky ishte goli i dhjetë i fitores i realizuar pas minutës së 90-të në Botërorin 2026, një shifër që nuk ishte arritur kurrë më parë në historinë e kompeticionit.

Serinë e golave dramatikë e hapi Amad Diallo i Bregut të Fildishtë, i cili vendosi sfidën ndaj Ekuadorit me një gol në fund të ndeshjes. Më pas erdhën realizimet vendimtare të Caleb Yirenkyi për Ganën, Deniz Undav për Gjermaninë dhe Kaan Ayhan për Turqinë gjatë fazës së grupeve.

Edhe faza me eliminim direkt ka prodhuar emocione të forta. Stephen Eustaquio i dha Kanadasë kualifikimin ndaj Afrikës së Jugut në minutën 90+2, Gabriel Martinelli vendosi fitoren e Brazilit ndaj Japonisë në minutën 90+6, ndërsa Gonçalo Ramos realizoi golin e triumfit të Portugalisë ndaj Kroacisë në minutën 90+4.

Në listën e autorëve të golave vendimtarë pas kohës së rregullt bëjnë pjesë edhe Mikel Merino për Spanjën, Youri Tielemans për Belgjikën dhe Neymar për Brazilin, duke konfirmuar se fundet dramatike janë kthyer në markën e këtij Botërori.

Statistikat tregojnë se Botërori 2026 po zhvillohet me një intensitet të pazakontë, ku asnjë rezultat nuk mund të konsiderohet i sigurt deri në vërshëllimën e fundit të arbitrit, duke e bërë këtë edicion një nga më spektakolarët në historinë e futbollit.