Gjenerali iranian: Shërbimet e huaja nuk kanë zbuluar ende fabrikat ku prodhohen raketat tona

Zëdhënësi i lartë i Forcave të Armatosura të Iranit, gjeneral brigade Abolfazl Shekarchi, ka deklaruar se kundërshtarët e Teheranit nuk kanë arritur të zbulojnë vendndodhjet ku prodhohen raketat iraniane, pavarësisht përdorimit të mjeteve të avancuara të zbulimit dhe inteligjencës.

Gjatë një takimi me aktivistë të Këshillit për Koordinimin e Zhvillimit Islamik, Shekarchi tha se Irani ka ruajtur fshehtësinë mbi kapacitetet e tij raketore dhe se përpjekjet e shërbimeve të huaja kanë dështuar.

Duke folur për zhvillimet e fundit ushtarake, gjenerali iranian përmendi operacionet “Premtimi i Vërtetë 1” dhe “Premtimi i Vërtetë 2”, si dhe stërvitjet ushtarake “Eqtedar”, duke deklaruar se Irani ka ndërtuar një bazë të gjerë objektivash ndaj kundërshtarëve të tij.

Sipas tij, udhëheqësi suprem i Iranit, ajatollah Ali Khamenei, ishte përgatitur edhe për një përballje të re ushtarake, përfshirë skenarët e zëvendësimit të komandantëve në rast të humbjeve në nivelet e larta të ushtrisë.

“Amerikanët përdorën kundër Iranit çdo armë që kishin rezervuar për Luftën e Tretë Botërore, por nuk arritën të na mposhtnin”, deklaroi Shekarchi.

Gjenerali pretendoi gjithashtu se kundërshtarët e Iranit kanë pësuar humbje të mëdha strategjike në rajon dhe se investimet e tyre shumëvjeçare ushtarake kanë dështuar.

Në përfundim të fjalimit, Shekarchi përsëriti se një nga objektivat kryesore të Forcave të Armatosura iraniane mbetet largimi i ushtrisë amerikane nga Azia Perëndimore, ndërsa bëri deklarata të ashpra ndaj Izraelit.