Ish-deputeti, Petrit Vasili, thotë se Presidenti Ilir Meta e ka përcjellë qartë mesazhin e tij për klasën politike sa i takon krizës ku është futur.

I ftuar në RTV Ora, Vasili tha se karrigia e asnjë zyrtari shqiptar nuk mund të jetë më e rëndësishme se fatet e popullit.

Vasili: Meta ka vënë në tavolinë të politikës dhe opinionit publik shqetësimin madhor që Shqipëria ndodhet para një katastrofe politiko-shoqërore shumë të rëndë dhe i ka tërhequr vëmendjen politikës që të sillet në mënyrë të përgjegjshme. Ai e ka thënë qartë se asnjë pozicion, asnjë karrige, ai ka përdorur metaforikisht edhe pozicionin e tij, nuk ka asnjë lloj rëndësie para fatit të vendit dhe shqiptarëve.

Meta as nuk ka qenë autor i krizës, ka qenë një njeri që ka tërhequr gjithmonë në vëmendjen e politikës për të pasur gjithmonë maturinë e duhur. Ka theksuar se karrigia e asnjërit nuk mund të jetë më e rëndësishme se fatet e shqiptarëve. Ka dhënë këtë vizion që në radhë të parë është prej patrioti dhe pastaj prej Presidenti.

Vasili mohoi të ketë dijeni mbi takimin Meta-Basha në Presidencë mëngjesin e së martës.

Vasili: Nuk kam informacion.Nuk kam komunikim me Metën, kam komunikim të përhershëm dhe të vazhdueshëm me kryetaren e LSI-së, Monika Kryemadhi.

I pyetur nëse opozita është e gatshme për dialog me mazhorancën, Vasili u shpreh:

Vasili: Ka një qëndresë parimore të opozitës e cila ka folur qartë: Të hapim rrugën që negociatat për BE të ecin para. E vetmja pengesë vazhdon të jetë ky Kryeministër.



/Ora News.tv/