Shkencëtarët rindërtojnë fytyrën e vajzës 9 mijë vjeçare

Shkencëtarët rindërtojnë fytyrën e vajzës 9

Shkencëtarët kanë rindërtuar fytyrën e një adoleshenteje greke 9 mijë vjeçare. Zbulimi hedh një shkëndijë të re drite për jetën e një periudhe që njihet si lindja e qytetërimit.

Ajo njihet me emrin Dawn dhe ka jetuar në veriperëndim të Greqisë 9 mijë vjet më parë. Grekët e shekullit 21 patën rastin ta shohin atë këtë muaj në muzeumin e Akropolit. Mbetjet e skeletit të saj u gjetën në një shpellë të Thesalisë në vitin 1993.

Specialisti i ortodontisë Manolis Papagrigorakis udhëhoqi ekipin që risolli në “jetë” vazën e lashtësisë në muzeum.

“Mosha e saj biologjike, nëse përcaktohet nga pjekuria e eshtrave, është rreth 15 vjeçe edhe pse del 18 vjeçare nga grafia e dhëmbëve, shto apo hiq një vit.”

Ekpi rindërtoi fytyrën e saj me kallëpë argjike duke përfshirë edhe 26 muskuj.

Ajo është e veshur me lëkurë të leshtë dhe ka një gjerdan kockash, stoli që besohet nga arkeologët se përdornin njerëzit nga mesi i epokës së gurit.

Nofulla e dalë e bën atë të duket si e ngrysur.

“Kocka e nofullës së poshtëme të Dawn është e dalë por funksionale. Nofulla mori këtë formë pasi ajo ndoshta zbuste lëkurat me gojë sikurse bënin eskimezët. Ata përtypnin lëkurën e fokave që ta zbusnin dhe ta përdornin për veshje”, thotë specialisti i fushës së stomatologjisë Manolis Papagrigorakis.

Dawn mund të ketë vuajtur nga anemia ose nga skorbuti. Të dhënat tregojnë se ajo kishte probleme me kockat e legenit dhe kyçet çfarë mund ti kenë sjellë vështirësi në lëvizje dhe mund të kenë ndikuar tek vdekja. /VOA/

EMISIONET