Kapen dy autorët e vrasjes në Kamëz, ja pamjet kur grabitësit hynë në market

Policia e Tiranës ka zbardhur ngjarjen në Kamëz, ku gjatë tentativës së grabitjes së një marketi mbeti i vrarë 52-vjeçari Agim Buci dhe u plagos bashkëshortja e tij, Rita Buci.

Në një deklaratë për mediat, drejtori i policisë së Tiranës Kastriot Skënderaj tha se dy autorët e dyshuar të krimit janë  Vladimir Kurti 28 vjeç, Ruzhdi Hode 25 vjeç, të dy banues në Tiranë.

Siç shihet edhe në pamjet e marra nga kamerat e sigurisë së marketit, aty kanë hyrë dy persona të veshur me të zeza dhe të mbuluar me kapuç. Skënderaj tha se ekzekutimi dyshohet se është bërë nga 28 vjecari Vladmir Kurti.

Burime për Ora News nga policia e Tiranës bëjnë të ditur se ata kanë pranuar autorësinë e vrasjes, duke u shprehur se kanë qëlluar në drejtim të Agim Bucit.

"U nisëm të merrnin çfarë të gjenim, sepse e dinimi që nuk kishin lekë", mësohet se ka thënë autori i dyshuar.

Autorët e dyshuar rrëfyen si e mbajtën djalin 6 vjecar

Kurti dhe Hoda u risollën edhe njëherë tek marketi ku kryen vrasjen dhe aty rrëfyen dinamikën e ngjarjes, sesi në fillim mbajtën djalin 6 vjecar dhe më tej qëlluan Meritën në këmbë, ndërsa në fund vranë Agimin me plumb në gjoks

Kurti i dënuar në 2010 me 5 vite burg

Burimet e policisë thanë se përgjimet telefonike dhe lokalizimi përmes celularit ishin provat kryesore, ndërsa të dy ishin mes 25 personave të shoqëruar në policinë e Tiranës që në momentet e para.  Kurti ishte i pari që shfaqi pendëse dhe tregoi rrethanat e krimit duke pranuar se ishte ai që qëlloi me pistoletë, ndërsa Hode mbante thikën në dorë.  28 vjecari Kurti është dënuar me 5 vite burg në 2010 për vjedhje me dhunë.

Vëllai i viktimës Rifat Buci dhe motra Lume Dika për mikrofonin e Ora News treguan të gjithë dinamikën e ngjarjes. Ata kërkuan që të vendoset drejtësia, ose në të kundër do të hakmerren.

Operacioni i koduar "Hijet"

Policia e Tiranës në bashkëpunim të ngushtë me Prokurorinë e Rrethit Gjyqësor Tiranë, finalizuan me sukses operacionin e koduar “Hijet” duke zbardhur dhe dokumentuar autorësinë e ngjarjes të ngjarjes së ndodhur 2 ditë më parë në Kamëz, ku gjatë vjedhjes me armë mbeti i vrarë shtetasi Agim Buci dhe u plagos bashkëshortja e tij, Rita Buci. Operacioni është rezultat i punës profesionale të pandërprerë, duke vlerësuar maksimalisht informacionet e mbledhura si dhe provat e administruara nga grupi i posaçëm hetimor.

Vladimir Kurti dyshohet se kreu vrasjen

Si rezultat i hetimeve të deritanishme, rezulton se autorë të dyshuar kësaj ngjarjeje janë 2 shtetasit:
- Vladimir Kurti, 28 vjeç, banues në Tiranë.
 - Ruzhdi Hode, 25 vjeç, banues në Tiranë.
Ata ndodhen aktualisht të ndaluar nga policia mbi bazën e urdhërave të dala nga Prokuroria. Nga hetimet rezulton se i dyshuari Vladimir Kurti ka kryer ekzekutimin me armë zjarri të shtetasit Buci dhe plagosjen e bashkëshortes së tij.

Sekuestrohet makina dhe veshjet e përdorura gjatë grabitjes

Në cilësinë e provës materiale është sekuestruar automjeti tip “Volklsvagen”, me të cilin autorët kanë shkuar dhe më pas janë larguar nga vendi i ngjarjes, veshjet dhe dorezat e përdoruara në vendngjarje.Ndërkohë vijojnë kërkimet për armën e krimit dhe thikën, të cilat të rinjtë i hodhën në lumë.

Materialet për këtë ngjarje do t’i kalojnë për veprime të mëtejshme Prokurorisë Prokurorisë Pranë Gjykatës së Shkallës së Parë Tiranë për veprat penale të “Vjedhjes me armë me pasojë vdekjen” e kryer në bashkëpunim dhe “Prodhimi e mbajtja pa leje e armëve dhe municioneve luftarake”. Policia e Shtetit, duke falënderuar qytetarët dhe mediat për bashkëpunimin, shprehet e vendosur të godasë me Forcën e Ligjit çdo akt, grup kriminal apo paligjshmëri, për të ndërtuar së bashku një Shqipëri më të mirë dhe të sigurt.




EMISIONET