Presidenti i Republikës, Ilir Meta ka përcjellë për të gjithë shqiptarët një urim për Pashkët.

Kreu i Shtetit thotë se le t'i shndërrojmë këto momente të vështira që po përjetojmë, në forcë e kurajo, sepse edhe fizikisht larg njëri-tjetrit, por me solidaritet e gjithëpërfshirje, ne mund dhe do t'ia dalim.

Mesazhi i Presidentit Ilir Meta

Të dashur qytetarë shqiptarë!

Të dashur besimtarë katolikë dhe ungjillorë!

Gëzuar dhe për shumë vjet Festën e Shenjtë të Pashkëve! Festën e Ringjalljes, të jetës, të shpresës dhe të dritës!

Sot Pashkët po i kremtojmë me "dyer të mbyllura" për shkak të pandemisë, që po shkakton shumë dhimbje, varfëri dhe frikë.

Ndaj më shumë se kurrë të gjithë kemi nevojë të ndjejmë thellë në shpirt e në zemrat tona mesazhin e Krishtit të Ringjallur, i cili na porosit: "Unë jam i Gjallë në mesin Tuaj, prandaj MOS KINI FRIKË".

Ringjallja e Krishtit na siguron se Zoti, për këdo që e beson, është i pranishëm kudo, në çdo vend dhe në çdo kohë. Ndaj le t'i shndërrojmë këto momente të vështira që po përjetojmë, në forcë e kurajo, sepse edhe fizikisht larg njëri-tjetrit, por me solidaritet e gjithëpërfshirje, ne mund dhe do t'ia dalim.

Sepse siç na porosit edhe Papa Françesku: "Ringjallja e Krishtit është forcë dhe kurajo në momentet më të vështira për mbarë njerëzimin. Dashuria na bën të shpresojmë në një botë më të mirë".

T'i gëzohemi thjeshtësisë së Festës së Pashkëve në familjet tona, dhe le ta ndajmë gëzimin tonë në lutje për shëndetin e të afërmve tanë, për shërimin e të prekurve nga kjo pandemi dhe për të gjithë mjekët e infermierët, heronjtë tanë, që po shërbejnë me përkushtim e sakrifica të pashembullta në vijën e parë të mbrojtjes së shëndetit të çdo qytetari. Të lutemi edhe për priftërinjtë dhe klerikët që po ndihmojnë sa mundin dhe janë pranë kategorive më të përvuajtura.

Të ndajmë të mirat dhe lumturinë tonë veçanërisht me të moshuarit, të vetmuarit dhe njerëzit më në nevojë, të cilët më shumë se kurrë kanë sot nevojë, jo vetëm për dhembshuri, por për dashuri dhe ndihmë.

Ju uroj të gjithëve Pashkë të bardha e të bekuara, me shpresën që mesazhi i kësaj Dite të Shenjtë të sjellë ringjallje të vërtetë në shpirtrat e zemrat tona, në familjet tona, në shoqërinë dhe në mbarë kombin tonë!

Një urim të veçantë kam për komunitetin e dashur të shqiptarëve në Italinë mike të prekur rëndë nga pandemia, për arbëreshët e mrekullueshëm, për arbanasit fisnikë të Kroacisë, dhe për të gjithë besimtarët shqiptarë kudo ndodhen.

PASHKË TË MBARA!

Mesazhi i urimit i Gramoz Rucit

Mesazh urimi ka percjelle edhe Kreu i Kuvendit Gramoz Ruci, i cili shpreh mirënjohje ndaj Kishës për mbështetjen në këtë sfidë ndaj COVID-19.

“Pashkë të Gëzuara në çdo vatër familjare! Pashkët e sivjetme i gjejnë besimtarët katolikë brenda shtëpive të tyre.  Gëzimi i festës ndrin, megjithatë, në familjet dhe zemrat e të gjithëve. Distancimi fizik e bën më të pathyeshme nevojën, afërinë dhe lidhjen shpirtërore. Të gjitha sakrificat kanë kuptim kur bëhen në emër të jetëve njerëzore. Mirënjohje Kishës Katolike dhe besimtarëve katolikë për mbështetjen e të gjithë shqiptarëve në këtë sfidë për jetën. Lumturia dhe gëzimi do të rikthehen shumë shpejt dhe të gjithë ne do të rikujtojmë se sa e bukur është jeta, sa i duhur është solidariteti, sa i dobishëm është besimi, sa i pazëvëndësueshëm është përdëllimi njerezor dhe sa  të çmuara janë vlerat te të cilat besojmë dhe mësimet nga të cilat udhëhiqemi. Në këtë Ditë të Bekuar le të përsërisim mirënjohjen tonë për mjekët, infermierët, policët dhe ushtarët dhe për të gjithë ata që janë bërë këto kohë rojtarë të jetëve tona si edhe familjet e tyre.”, shkruan Kryetari i Kuvendit, Gramoz Ruçi, në urimin drejtuar besimtarëve katolikë me rastin e Pashkëve

Mesazhi i urimit i Monika Kryemadhit

"Në vigjilje të kremtimit të Pashkëve, ringjallja e Krishtit sjell pranë familjeve tona shpresën e gëzimit të jetës përtej vështirësive.

Pas javëve të kreshmës, të kaluara në një situatë të vështirë si kjo që po përballemi të gjithë bashkë në kushtet e pandemisë, kjo ditë e bekuar na fton të shikojmë përpara duke hapur zemrën ndaj të mirës, të forcojmë besimin te Zoti dhe dashurinë për njëri-tjetrin, për vendin, kombin. Kështu, e nesërmja jonë do të jetë me siguri e lumtur.

Pashkë të bekuara, me shpresën se paqja dhe harmonia do të mbizotërojnë gjithmonë në familjet tuaja! Zoti e bekoftë Shqipërinë dhe shqiptarët!"

/Ora News.tv/