Policia e Tiranës ka finalizuar një operacion policor mbrëmjen e së mërkurës, 21 nentor, në kryeqytet ku ka sekuestruar një sasi të konsiderueshme lënde narkotike heroine, armë zjarri e sende të tjera.

"Operacioni policor i koduar "Kombinati" u mbyll me sekuestrimin e 3.9 kg lëndë narkotike e dyshuar  heroinë, si dhe 2 të arrestuar që dyshohet se ishin poseduesit, që njëkohësisht edhe shpërndarësit e lëndës narkotike të sekuestruar gjatë operacionit.

Heroina shpërndahej në zonën e Kombinatit dhe Tiranës së Re.

"Në bazë të informacioneve të siguruara në rrugë operative nga burime të ndryshme, se dy persona në zonën e Kombinatit dhe Tiranës së Re, po shpërndanin lëndë narkotike heroinë, kanë organizuar dhe finalizuar operacionin policor të koduar "Kombinati", si rezultat i të cilit u bë kapja dhe arrestimi në flagrancë i shtetasve K. B., 23 vjeç, lindur në Berat dhe banues me qira në Tiranë, i dënuar më parë për prodhim dhe shitje të narkotikëve dhe D. Ll., 18 vjeç, lindur në Berat dhe banues me qira në Tiranë" informoi policia.

Si u lokalizua

Shërbimet e Komisariatit të Policisë Nr. 6, rreth orës 22:00 të mbrëmjes së djeshme, në afërsi të stadiumit 'Dinamo' kanë lokalizuar dhe ndaluar shtetasin K. B. dhe gjatë kontrollit të tij, në një çantë krahu që mbante, në xhepin e brendshëm është gjetur një qese transparente, brenda së cilës kishte lëndë të dyshuar heroinë.

Pas kontrollit në banesën e tij me qira në rrugën “Gjin Gjergji” dhe nga kontrolli i ushtruar u gjetën dhe u sekuestruan në cilësinë e provës materiale sendet, një armë zjarri pistoletë tip TT me dy krehëra metalik dhe 21 fishekë, një shkop metalik me hapje, si ato të punonjësve të Policisë, një sasi lënde narkotike në formë të ngurtësuar, e dyshuar heroinë.

Operacioni ka vijuar me kapjen e shtetasit D. Ll. dhe gjatë kontrollit të këtij shtetasi, Policia i gjeti dhe sekuestroi në cilësinë e provës materiale një përforcues grushti metalik, një elektrik paralizues, një sasi lënde në formë të ngurtësuar, e dyshuar heroinë.

Materialet procedurale do t’i kalojnë Prokurorisë pranë Gjykatës së Shkallës së Parë Tiranë, për veprime të mëtejshme hetimore, për veprat penale “Prodhimi dhe shitja e narkotikeve” dhe “Armëmbajtja pa leje”.

/Ora News.tv/