Në 10 vjetorin e themelimit të Fondacionit Konrad Adenauer, presidenti Ilir Meta ka apeluar që politika të reflektojë ndaj të shkuarës për të mos lejuar që vendi të zhytet në izolim.

Meta: Demokracia nuk ngel në vend, nuk fotografohet. Ajo forcohet dhe konsolidohet, ose tkurret dhe vdes ngadalë. Ndaj është shumë e rëndësishme t’i rikthehemi në vazhdimësi të kaluarës, për të mos lënë asnjë mundësi për t’u zhytur përsëri në izolim apo arbitraritet dhe për të mos shuar llogaridhënien që është vendimtare, dhe që dallon një sistem demokratik nga një jodemokratik.

Kryetari i Partisë Demokratike, Lulzim Basha, tha se keqqeverisja e ka lënë vendin në udhëkryq të rrezikshëm, por sipas tij fokusi do të mbetet "Shqipëria si gjithë Europa".

Basha: Në këto kohë, për vendin tim, thënia e Konrad Adenauer se ”Demokracia nuk mund të merret kurrë si e mirëqenë”, është më aktuale se kurrë më parë. Ndaj, unë jam plot besim se bashkë me shqiptarët dhe me ndihmën e miqve tanë, do t’ia dalim ta bëjmë Shqipërinë si Europa.

Nga ana tjetër presidenti i Konrad Adenauer, Norbert Lammert, i bëri apel palëve të mos bojkotojnë demokracinë.

Lammert: Nuk më pëlqeu kur socialistët bojkotuan parlamentin se demokratët fituan zgjedhjet e po aq më pak më pëlqen që demokratët bojkotojnë parlamentin se rezultati i zgjedhjeve nuk është në favor të tyre.Rruga drejt të ardhmes nuk është me bojkote të ndërsjellta apo me refuzime për bashkëpunim.

Fondacioni gjerman Konrad Adenauer festoi 10 vjetorin e pranisë në Shqipëri ku kujtoi dhe kontributin e  dhënë në funksionimin e demokracisë në vendin tonë.


/Ora News.tv/