Banorët e Valbonës qëndresë 20 orëshe përpara Parlamentit
Banorët e Valbonës në Tropojë kanë shpallur atë që ata e quajnë qëndresë 20 orëshe përballë Parlamentit të Shqipërisë si shprehje të revoltës së tyre për atë që ata e quajnë masakër në luginën e Valbonës.
Banorët thonë se vendimi vjen pas dy vitesh protesta të vazhdueshme qytetarëve dhe thirrjes së drejtuar autoriteteve shtetërore "për frenimin e funeralit të Valbonës".
Duke e konsideruar të turpshëm dhe arbitrar vendimin e Gjykatës Administrative, që vendosi sipas tyre për interesa të ngushta oligarkësh, banorët paralajmërojnë se nuk ka kthim mbrapa.
"Qëndresa jonë vijon deri nesër në marshimin e madh që nis në orën 11:00 nga Parlamenti drejt Kryeministrisë. Ne nuk do e falim kurrë Valbonën. Protesta dhe revolta e shqiptarëve shumë shpejt do të zbresë në kantierët e dhunimit të pa shembullt të të perlës së alpeve shqiptare. Me qindra do të jemi nesër në marshim, me qindra do të marshojmë së shpejti në Valbonë", thuhet në njoftim.