Arabia Saudite ekzekuton 37 të dënuar për terrorizëm

Arabia Saudite ekzekuton 37 të dënuar për terrorizëm

Ministria e Brendshme e Arabisë Saudite njoftoi ekzekutimin e 37 të burgosurve për shkak të lidhjeve me terrorizmin.

Trupat e dy të ekzekutuarve janë shfaqur në publik për disa orë, veprim ky që nuk praktikohet shpesh në Arabinë Saudite.

Ekzekutimet masive u kryen në pesë rajone: në kryeqytetin Riad, qytetet e shenjta të Mekës dhe Medinës, rajonin sunit të Al-Qasim dhe në rajonin e Provinca Lindore, ku është përqendruar pakica shiite.

Qeveria thotë se kjo mënyrë është mjet i fuqishëm parandalimi për veprime të ngjashme.

Komunikata e ministrisë së Brendshme thotë se personat e ekzekutuar kanë përvetësuar ideologji ekstremiste si dhe kanë formuar celula terroriste me qëllim të përhapjes së kaosit dhe provokimin e përçarjeve midis sekteve.

“Këta individë janë gjetur fajtorë për sulme me eksplozivë ndaj forcave të sigurisë duke lënë të vrarë një numër të pjesëtarëve si dhe bashkëpunim me organizatat armike”, thuhet në komunikatë.

Ekzekutimet që ndodhën të martën, fillimisht u miratuan nga ana e oborrit mbretëror.

Disa ditë më parë grupi militant i ashtuquajtur Shteti Islamik mori përgjegjësinë për sulmet në një ndërtesë të forcave të sigurisë në Arabinë Saudite.

EMISIONET