Vettingu në polici, Ristani: Po bëhet vetëm zëvendësimi i një kupole mafioze me një tjetër

Vettingu në polici, Ristani: Po bëhet vetëm zëvendësimi

Për partinë më të madhe të opozitës, Vettingu i nisur në polici nga ministri i Brendshëm, Fatmir Xhafaj, është thjesht propagandë.

Sekretari i përgjithshëm i Partisë Demokratike, Arben Ristani tha se publikimi në disa media i lidhjeve të ish-ministrit të Brendshëm, Saimir Tahiri dhe disa zyrtarëve të lartë të Policisë së Shtetit me trafikun e drogës, janë fakte të reja që provojnë se në polici nuk po ndodh Vetting, por zëvendësimi i një kupole mafioze me një tjetër. Sipas tij në polici po ndodh rokada nga Habilajt tek Xhafajt.

Ristani: Sipas raportit zyrtar të shërbimit sekret, 128 oficerë policie, përfshirë edhe drejtues të lartë të saj, kanë marrë pjesë dhe kanë përfituar nga trafiku i kanabisit.

Deri tani nuk është bërë publike asnjë masë e marrë ndaj tyre, ndërsa tre drejtues të policisë në qarqe, të akuzuar për lidhje me Habilajt dhe Tahirin, janë në arrati.

Urdhri i Ministrit të Brendshëm Fatmir Xhafaj, për pezullimin e oficerit të përfshirë në trafikun e kokainës është veç një nga masat propagandistike, sepse media raporton se Julian Balliu është arratisur, njësoj si tre drejtuesit e tjerë të lartë të policisë.

Pezullimi nga Fatmir Xhafaj është propagandë, njësoj si vettingu që thotë se do të bëjë në polici vëllai i Agron Xhafës, që është dënuar për trafik ndërkombëtar kokaine.

Partia Demokratike thotë se pa largimin e Fatmir Xhafës dhe Edi Ramës, si koka që mbron krimin e organizuar në Shqipëri, nuk do të ketë vetting të vërtetë në polici dhe as rend dhe siguri për shqiptarët.   

EMISIONET